Համառոտ ակնարկ
Հետազոտական դպրոցի նպատակը հասարակագիտության ոլորտում հետազոտական կարողությունների զարգացումն է: Մասնակիցները կծանոթանան որակական և քանակական հետազոտություն իրականացնելու մեթոդներին: Դպրոցը կմեկնարկի հասարակական հետազոտության ընդհանուր տրամաբանության քննարկմամբ: Այնուհետև, անդրադարձ կլինի որակական հետազոտությունների առանձնահատկություններին: Ի թիվս որակական այլ մեթոդների, կներկայացվեն «հաջողության պատմություններ» հավաքագրելու և ներկայացնելու մեթոդները:

Դպրոցը կշարունակվի քանակական հետազոտությունների մեթոդաբանական սկզբունքների ներկայացմամբ, հիմնական գիտելիքներ կփոխանցվեն հարցումների իրականացման, հարցաթերթերի մշակման վերաբերյալ: Հատուկ ուշադրություն կդարձվի առցանց հարցաթերթերի ստեղծման հմտությունների փոխանցմանը: Կմատուցվեն որակական և քանակական հետազոտությունների տվյալների վերլուծության հիմնական մոտեցումներ: Դպրոցը կեզրափակվի արդի աշխարհում հանրայնորեն հասանելի տվյալադարանների ներկայացմամբ, կքննարկվեն դրանցից օգտվելու ձևերը:

Ում համար է

 Հետազոտական դպրոցին կարող են մասնակցել`

• Գյումրու երիտասարդական կամ երիտասարդների հետ աշխատող կազմակերպությունների աշխատակիցներ և կամավորներ,
• Գյումրու հիմնական և ավագ դպրոցների ադմինիստրատիվ աշխատակազմ և դասղեկ-ուսուցիչներ,
• Գյումրու երիտասարդների հետ առնչվող պետական, տեղական ինքնակառավարման մարմինների և դրանց ենթակայության տակ գտնվող կառույցների աշխատակիցներ և կամավորներ,
• երիտասարդական և սոցիալական աշխատողներ, արտադպրոցական կրթական հաստատությունների խմբավարներ, դասընթացավարներ, մանկավարժներ և հոգեբաններ,
• իրավապահ մարմինների և առողջապահական հիմնարկների աշխատակիցներ,
• մեդիա ոլորտի ներկայացուցիչներ,
• այլ շահագրգիռ կողմերի ներկայացուցիչներ:

Դպրոցի դասընթացավարները

Դասընթացը կվարեն Հետազոտական ռեսուրսների կովկասյան կենտրոն-Հայաստանի աշխատակիցներ Տաթևիկ Ազիզյանը, Սոնա Բալասանյանը, Էլլա Կարագուլյանը,, Հեղինե Մանասյանը և Տիգրան Մաթոսյանը: